وصفة الأخت ميرال حبات تفيدنا بها لله يجزيها بخير
حبيباتي اليوم بغيت نفيدكم بموضوع جديد عن التساقط لكان عندي رهيب بسب الرضاعة وملي وقفت الرضاعة زاد طاح وشعري فينما مشيت نلقاه طايح حتى فحويج ولدي
بعد معاناة كبيرة من التساقط وبعد زيارة الطبيب وأخد الدواء ولا نتيجة وبعد وبعد وبعد …………….
اليوم لقيت الحل وأهم حاجة فيه ساهل…………..
المهم ندخلو لصلب الموضوع :
بعدما شفت النتيجة المذهلة في شعر قريبات زوجي ليكان شعرها قصير و دغيا كيتكرد وولا مشاء الله طويل وغزال وكتير
مسكينة مخبات عليا ولو بقوة الفرحة ديالها
هي علبة كتباع عند العطار خضراء مرسومة فيها إمرأة بشعر طويل ملي كتحلي العلبة فيها 2 قراعي زيت وحدة ديال القطران ولخرى يمكن ديال الزنجلان حيت مكاتبين عليهم والو وكيس صغير فيه مجموعة أعشاب مدقوقة هاهي الصورة
كنخلط العناصر ب 3 فشي قرعة ووقتما بغيتي تمشي الحمام كتخدي جهد معلقة كبيرة وتزيدي عليها زيت العود الجهد ليدهن لك شعر كتخلطي كلشي دهني وسري لحمام غسل
اوى بصحتك التحمم مسبقا وبصحتك شعرك في حلة الجديدة هاد الوصفة كتعطي للشعر واحد البريق عجيب والله شاهد على ما أقول كتقوي الزغبة من جديد كتحيه وكتشد الزغبة في الراس + ترطيب رهيب رهيب والله أنا شعري أصلاً رطب ولكن بهاد الوصفة زاد أكتر وأكتر وكأنه كراتين أو شيء من هاد القبيل يكفي غير نشف شعري بسيشوار كيولي مطلوق بلا تجباد
نسيت ماقلتش لكم راه هادشي غير ب 20 درهم فقط مكتوب في العلبة حمادة بنشقرون فاس
المشكل الوحيد هي ريحة القطران أنا كندير وسط الحمام باش راجلي ميشمش فيا ديك الريحة وخى كنخليه غير شوية عطا نتيجة دارتو 3 ديال المرات لاحضت تغيير فعلي المشكل لعندي وخى غسلت البارح مزيان 3 ديال المراة بشمبوان ديال النعناع والبلسم ديالو بقات في ريحة شوية وخى ملي رجعت لدار هويتو نشفت بسشور بش ميشم راجلي والو ولكن شم فيا الريحة ومعجباتوش وسولني ديالش قتلو دوا ديال لشعر لشرتلي داك النهار قلي كن كان كيحسبلي رحتو هاك منشرهش لك قالها غير بضحك صافي قلتلو إلى معجبتكش ريحة منعودش نديرو
المهم فوائد ديال هاد الزيت بنسبة لستعملوه وشهادات لشفت بعيني على حسب نوع الشعر :
قريبة زوجي شعرها جاف و متقصف وعمرو ماوصل لكتفاها ديمة كيطوال شوية كيتكرد ويطيح بني وبنكم شعرها ناشف بزاف ملي دارت هاد الوصفة شعر مبقاش يتكرد وزغبة نزلات وولات لينة والشعر نزال فايت الكتاف وكتيف مشاء الله ولكن دومات على الوصفة شهور
أختها الصغيرة شعرها ناشف ولكن كتيف الوصفة جعلات شعرها أكتر كتافا ناد لها شعر كتير ولين حتى ماماه وحلت في المشيط ديالو وقرارات تحبسوا لها
مرات شيخي حتى هي ستعملاتو شعرها بين وبين حتى هي وقف لها التساقط + الرطوبية
أختي شعرها جاف شوية وتساقط حتى هي توقف لها الساقط + ليونة
ماما الله يحفدها ليا شعرها رطب أصلاً بحالي وكانت جلدة ديال شعرها كدرها ملي ستعملاتو مبقاش جلدة كدرها + وقف التساقط
إو التجربة ديلي أنا كيفما وصفة لكم في ضرف 3 ديال المراة توقف تساقط بشكل ملحوض + رطوبة ونعومة فائقة الحمد لله + متنساوش الصدقة صدقو على قبل شعركم راه الصدقة حتى هي علاج أنا وليت وقتما تاحت ليا الفرصة في طوبيس أو في الزنقة نصدق ليكان بنية الشفاء وميهمنيش داك الشخص يستاهل الصدقة ولا لا المهم نصدق بنية الصدقة
راه العلبة خضراء مرسومة فيها مرا شعرها طويل والعلبة فيها 3 ديال الأشياء 2 زيوت واحد ديال القطران ولاخر ديال الزنجلان وكيس صغير فيه الأعشاب مدقوقة ومكتوب على العلبة أعشاب حمادة بنشقرون فاس.