غادي نوريكم 4 حشوات كنديرهم فلبريوات ممكن ديرو لي حبيتو حسب المتوفر و حسب الذوق
ـــ الحشـــوة الاولـــى : بالدجـــاج
خديت 2 صدور الدجاج قليتهم، فالزيت مع 3 بصلات وثومة محكوكة وملح وزعفران وزدت الربيع ونص كنور و بزار و تحميرة و سكين جبير وسدي عليهم وباش غادي يطيبو
ملي طابو فرتت الدجاج و قطرت المرق و درت عليه 4 بيضات مع آلتحريك فوق النار
و فالاخير خلطت الدجاج مع المرق و درت شوية سكر كلاصي باش يجي حلو
اللوز مادرتش حيت يلا دخل لفريكو ماكيبقاش زوين
ـــ الحشـــوة الثانيـــة : بفواكـــه البحـــر
كنشحر 2 بصلات متوسطين فالزيت مع ملح و بزار حتى يدبالو ونزيد الشامبينيون ثم لكروفيت و الكالامار غي هو يلا كان طري ماشي لي كيتباع معلب من الاحسن يتسلق لول باش يجي رطب و نديرو معاهم ربيع و ضريس ثومة صاين نزولوه من بعد
ملي نقربو نطفيو عليه كنخويو فوقو صوص الصوجا
واللمسة الاخيرة نحكو عليه شوية زعتر
ملي يطيب الخليط نخلطوه مع الفيرميسيل مطلوقة فلما طايب
ـــ الحشـــوة الثالثـــة : بلادانـــد
بنفس الطريقة كنشحرو لبصلة مع ملح و بزار و ثوم محكوك و نضيفو الشمبينيون و لاداند مقطع صغير و الربيع و فالاخير نزيدو الصوجا و الزعتر والفرماج
ملي يطيب الخليط نخلطوه مع الفيرميسيل مطلوقة فلما طايب
ـــ الحشـــوة الرابعـــة : بالكفتـــة
كنشحرو لبصلة مع ملح و بزار و ثوم محكوك و نضيفو الشمبينيون و الكفتة متبلة و فالاخيرنزيدو الصوجا والزعتر
ملي يطيب الخليط نخلطوه مع الفيرميسيل مطلوقة فلما طايب
دابا كلشي عندنا واجد
نحتاجو ورقة البسطيلة انا كفاتني كيلو و نض لهاد لقياس
ودقيق مع لما باش نسدو لبريوات
نبداوو نعمرو
طريقة لف لبريوات معروفة
وهكدا كنرتبهوم فميكات و كنكتب فيهوم وريقات باش نعرفهوم ديالاش ملي نبغي نجبد
الصراحة كينفعو بزاف ملي يجيك شي حد على غفلة ولا تبغي تبدلي الروتين ولا تلفاتلك شنو طيبي
و هنا طيبت شي وحدين قبل ما نصطوكيهم فلفريكو كيجيو يم يم
اللهم ادمها نعمة و احفظها من الزوال
وبالصــحـــــة والـــــراحـــــة