السلام عليكم أخواتي, اليوم نزلت ليكم وصفة شوارما الدجاج,
وصفة سهلة و كتجي زوينة, و ما غا تحتاجوش عطرية الشوارما و لكن الأهم هو خبز الشوارما التركي لي غا دا نواريكم كيف تقادوه بكل سهولة.
على بركة الله نبدو بمقادير الدجاج :
250 غ صدر دجاج مقطع أطراف رقيقة + 1 بصلة صغيرة محكوكة + 3 ضروس ثومة محكوكين + ملح و إبزار + ½ زلافة صغيرة ديال الخل و معلقة صغيرة من القرفة ” هدا هو السر في المداق ” + 2 معالق كبيرة ديال الزيت ما غاديش نديروها في الاول
رقدي الدجاج مع المكونات ما عدا الزيت , غطيه و خليه على الاقل 3 او 4 ساعات و من الأفضل ليلة كاملة.
ملي تبغي طيبيه ضيفي شوية ديال الخرقوم الى بغيتي و غطيه و نقصي عليه العافية.
خليه حتى إنشف من الخل والماء لي طلق عاد ضيفي 2 معالق كبار ديال الزيت و خليه اتقلى فيهم مع التحريك.
ملي تنشف الزيت طفي عليه
نجيو نحضرو خبز الشوارما :
زلافة كبيرة ديال الدقيق + 1 معلقة صغيرة ديال الخميرة الجافة + 1 معلقة صغيرة سنيدة + 1 معلقة كبيرة من الزيت + الملح + ماء دافئ
نعجنو العجينة ديالنا مزيان و نقسمها على 6 كرات.
{ القياس لي قدمت ليكم كيعطي 6 شوارمات}
خليهم ارتاحو واحد 5 دقائق و بداي سرحي بالدلاك الكرة الاولى بعدما تكوني سخنتي المقلة ديالك.
سرحي مزيييان و ديريها طيب.
ملي يبانو ليك بحال فقاعات قلبي علي الجهة الُثانية
لي طابت دخليها للبلاستيكة باش إبقاو رطبين.
باش نعمرو الشوارمات ديالنا غانحتاجو :
خس مقطع + شوية ديال الفريت + فروماج السندويتش
صوص المايونيز { 2 معالق كبار مايونيز + 1 معلقة صغيرةزيت الزيتون + 1 ضرس ثومة محكوك + عصير نصف حامضة }
ونبدو نعمرو الشوارمات ديالنا
فوق الدجاج نضيفو معلقة صغيرة من صوص المايونيز الي حضرنا و نوضعو 1/2 مربع الفروماج , و نسدو الشوارما ديالنا
وهاهما الشوارمات ديالنا واجدين
