لكل المبتدئات والمغتربات في الخارج اللواتي يصعب عليهم إيجاد العسل جبت ليكم هاد الطريقة المجربة والمضمونة

المقــــاديــــر والطــــريقــــة :
2 قوالب سكر + كاس كبير سنيدة + كاس عنبة ماء + باديانة أو 2 + 3 عواد قرفة + حب الهيل إختياري + 2 حامضات + حبات قرنفل
في طنجرة غارقة : نضع السنيدة والماء على نار مهيلة حتى يحمر لونه ويولي بني خفيف ثم نضيف السكر مهرس + 2 لتر الا ربع ماء + والتوابل و 2 حامضات مقطعين ومعصرين ونخليوه يطيب على نار عالية حتى تدوز تقريبا ثلث ساعة نطلو عليه غلى ودار رغوة كثيفة ننقصو العافية وناخدو شوية فطبيسيل ونبردوه ونشوفو الكثافة ديالو واش هو هاداك نطفيو عليه اذا باقي جاري نخليوه شوية يزيد الطياب واذا لقيتوه قصاح اكثر من القياس نزيدو كاس ماء طايب ويغلي 2 غلوات ونطفيو
نتمنى نكون شرحت مزيان ( اي تساؤل لا تترددن في الطرح)
وهاهو وجد بالصحة والراحة
ملاحضة : هاد العسل ممكن يبقى عام و أكثر وبلا ميتسكر (يعني يتحول لسكر)
مللي نبغيو نديرو الشباكية ناخدو الكمية لي تقدنا ونزيدو روح الزهر وشوية مسكة حرة ونسخنوه مزيان ونطفيو الشباكية فيه
بالنسبة اللي معندوش القوالب ديال السكر ممكن تعويضه بطويبات إذا مكانوش الطويبات ممكن سنيدة ونفس الطريقة اعلاه لكن في حالة غتعملوه بسنيدة فعملو حامضة وحدة فقط لانها حامضة والماء بالنسبة للطويبات وسنيدة فعملو لتر ونص ماء + كاس ( يعني أقل قليلا من 2 لتر إلا ربع)
نتمنى يكون كلشي واضح وكيف قلت اي سؤال لا تترددن في الطرح
نسالكن الدعاء عزيزاتي