باسم الله الرحمـــــــــــــــــــان الرحيـــــــــــــــــــــــم
السلام عليكم ورحمـــــــــــــــة الله و بركــــــــــــــاته
عواشركم مباركة و الله يدخل علينا شهر رمضان بالصحة والسلامة و يقدرنا على صيامه و قيامه….
اندخلو في الموضوع على طول….أول مرة اندير سلو و الحمد لله ربي ماحشمنيش جا غزااااال و مسيو عطاني 10/10 أحم أحم هههه
المكونـــــات :
1 كيلو الدقيق + 250غ اللوز مسلوق و مقلي و مطحون + 150غ اللوز مسلوق و مقلي و مهرمش + 150غ الكركاع مهرمش + 150غ الكاوكاو محمر نصف مطحون و نصف مهرمش + 250غ الجنجلان محمر و مطحون + 250غ الجنجلان محمر و مكمول + 3 معالق نافع مطحون + 1 معلقة حبة الحلاوة + 2 معالق القرفة مطحونة + شوية قليلة المسكة الحرة
250سل الزيت + 250غ الزبدة + 300غ العسل + 300غ السكر كلاصي
الطريـقـــــة :
- كنحمرو الدقيق في الفران مسخن على °200 د حرارة شي ساعة تقريبا وكل 5 دقايق نحركو الدقيق (كل ما تحمر الدقيق كل ما اللون غادي يجب غامق)
- الدقيق بعدما تحمر وبعدما نقينا و حمرنا و طحنا و هرمشنا العناصر ديالنا
- الدقيق بعدما تحمر و تغربل وضفت اللوز والكركاع والكاوكاو والنافع وحبة الحلاوة والقرفة والمسكة الحرة والجنجلان
- والعسل السكر كلاصي والزيت و الزبدة(الزبدة دوبنها و خليتها حتى جمدت عاد خديت غير الزبدة فقط بلا ماء) كنخلطوهم عاد كنزيدوهم على الخليط
- بهاد القياس كيجي شوية ناشف انا عملت شوية ناشف شوية عادي…الى بغيتيه مايكونشي ناشف زيدي فيه الزبدة و الزيت و العسل على دوقك**
- ديرت كويرات باش كيجي ساهل كل واحد يهز كورتو ماشي يلعب بيها الا ياكلها هههه وزوقتها باللوز
وبالصــحـــــة والـــــراحـــــة
