كوني لالة مولات الدار فتسيير المصروف ديال دارك بهاذ الأفكار

اول حاجة ننصحكم بيها هي : الصنيديقة
قضية الصنيديقة غزالة، أنا بيها كندير فراش الدار و الميعنات، و الحمد لله ربي ميسر واخا كنشري شوية بشوية، لكن كل مرة كندير حاجة باينة، الاغلبية كيستهزؤو بالجميع فالحصالة أو الصنيديقة، ولو تكونو كترميو فيها غير ريالات او درهم فاليوم
لكن تيقوني ديك الصنيديقة كتولي كنز كل نهار كزيد
خصوصا لما كتلوحي فيها و نتي كتقولي بسم الله اللهم بارك لي في رزقي، و كل مرة فتحتيها كتصدقي منها واحد القسيم باش ربي يزيد و يبارك فالرزق، بالنسبة للحاجات للي كتضيعلينا الفلوس بزاف خصوصا حنا كسيدات
بحال صالونات التزيين و ليسوان و الملابس …
فهادي طريقتي للي مكنبدلش و لقيت فيها راحتي و راحت جيبي، الحمد لله محجبة و الله يزيد يهديني، مكنمشيش عند الكوافورة، هاد زوج زغيبات للي عندي كنصابهم الراصي فداري
خديت المكوات متعددة الاستعمالات

و كنتفنن ف2 زغيبات للي عندي نسرح نبوكلي نمشط نكريبي… انا و ڭانتي و وقتي، بدل مكل مرة منشي عند الكوافورة و نستنا نوبتي و نحرق راسي بالسشوار المكواة احسن و اقتصادية اكثر، بالنسبة للعناية الشخصية (حمام ، سوان …) فكنديرها فداري و بنفسي مكنمشيش الحمام او عندك استيتيسيان حمامي و مركز التجميل ديالي كنديرو فالدوش الدار و نهني راسي بالنسبة الل يسوان les soins كناخذهم مرة حتال 2 فالعام يعني كريمات الترطيب و كنحفظهم فالثلاجة و العطور الماركات كناخذ 2 انواع كل سنة واحد للبرد و الثاني للصيف و كيبقى عندي اكثر من 2 نوات لاني مكنكثرش من العطر عادة كنفضل الكريمات اما باقي ليسوان بحال مضادات العرق و لوسيون الترطيب … كناخذها شهريا او كل 2 شهور
و كنستعمل الوصفات الطبيعية :
(ماء ورد او زهر، عسل ، طين اخضر او ابيض او اصفر مكنشريهش انما كنجيبو معايا من الطريق لما كنكون مسافرة ، الرماد حتي هو مزيان للبشرة و للاسنان جربوه كلو معادن… يعني حاجات بسيطة متوفرة للكل بلى مصاريف زايدة…)
بالنسبة للحوايج كنشري موسميا يعني لباس الشتا و لباس الصيف و لباس بينو بين للخريف و الربيع، ليا و لراجلي و لوليدتي نفس السيستام يعني لباس موسمي سواء ا البيجامات او لباس الدار او لباس الزنقة…
كنشري اغلبية وقت التخفيضات و اللكيداسيون هكا كنوفر عليا فلوس كثار
(وخا بيني و بينكم مكرهتش نشري ديما غير كنحبس راسي ههههه خصوصا لما كتجيني شي سلعة او كتجي لشي زميلة فالتجارة كنحمآآآق على الشراوط و السبابط نقطة ضعفي واخا مكنلبسهمش ههههه كيلبسهم الماريو لكن الله يعفو قولو امين)